Cynllun Ailddechrau
Bydd y Cynllun Ailddechrau yn chwalu’r rhwystrau a allai fod yn eu hatal rhag dod o hyd i waith. Bydd darparwyr yn gweithio â chyflogwyr, Llywodraeth Leol a phartneriaid eraill i gyflwyno cefnogaeth wedi’i theilwra ar gyfer unigolion.
Bydd y Cynllun Ailddechrau yn rhoi hyd at 12 mis o gefnogaeth wedi’i theilwra i bob cyfranogwr. Gellir ystyried rhoi mynediad cynnar i rai unigolion os bydd y sgwrs ag anogwr gwaith yn awgrymu mai hon yw’r ffordd fwyaf priodol i’r unigolyn.
Bydd y Cynllun Ailddechrau, sy’n cael ei gomisiynu gan yr Adran Gwaith a Phensiynau (DWP) yn cael ei redeg ar draws Cymru a Lloegr mewn 12 gwahanol Ardal Pecyn Contract (CPA).
*Unigolion sy’n hawlio Credyd Cynhwysol ac yn rhan o’r System Chwilio am Waith yn Ddwys am o leiaf 9 mis yn olynol, ac wedi cael Lwfans Ceisio Gwaith o’r math newydd yn cyfrif tuag at hyn.
Ochr yn ochr â’n partneriaid rydyn ni’n falch dros ben fod yr Adran Gwaith a Phensiynau (DWP) wedi ein dewis ni i gyflwyno’r rhaglen cyflogadwyedd Cynllun Ailddechrau mewn 2 Ardal Pecyn Contract (CPA):
CPA 1a – Gorllewin Canoldir Lloegr (yr Ardal Ddu, Coventry, Birmingham Fwyaf a Solihull, y Gororau a Swydd Gaerwrangon)
CPA 6 - Cymru
Rydym wedi ymrwymo i annog adferiad economaidd ar ôl Covid ac rydyn ni’n falch o gefnogi Cynllun y Llywodraeth ar gyfer Swyddi. Fel rhan o’r Cynllun Ailddechrau bydd ein rhaglen yn helpu cyfranogwyr ar eu siwrnai i ddod o hyd i gyflogaeth gynaliadwy, gan eu galluogi i symud at ddyfodol mwy sicr.
Rydyn ni wedi ymrwymo i weithio mewn partneriaeth, ac mae ein Cynllun Ailddechrau yn cyfuno sgiliau’r sector cyhoeddus, y sector preifat a’r sector gwirfoddol. Fel y darparwr arweiniol ac integreiddiwr gwasanaethau rydym yn awyddus i helpu BBaCh (busnesau bach a chanolig eu maint) a phobl arloesol sy’n newydd i’r farchnad gyflogadwyedd, gan gynnig iddynt y cyfle i ddatblygu eu capasiti.
Mae ein tîm Partneriaeth eisoes wedi ymgysylltu ag amrywiaeth eang o randdeiliaid a darparwyr gwasanaethau ym mhob CPA, ac maent yn gweithio gyda’i gilydd i ddylunio gwasanaeth sy’n bodloni’r galw lleol am sgiliau a llafur.
Mae gwella’n barhaus wrth wraidd popeth a wnawn a drwy ddatblygu Canolfan Ragoriaeth byddwn yn defnyddio data ac ymchwil i’r eithaf i greu ymarfer seiliedig ar dystiolaeth sy’n ysgogi canlyniadau positif. Bydd y sylfaen wybodaeth hon yn cyfrannu at hybu’r sector ac ansawdd rhaglenni cyflogadwyedd i bobl a fu’n ddi-waith yn y tymor hir.
Rydym yn sylweddoli bod siwrnai pob Cyfranogwr yn ôl i waith yn wahanol a chaiff y Cynllun Ailddechrau ei deilwra i fodloni anghenion pob unigolyn. Rydym wedi creu gwasanaeth sy’n hyblyg, gan alluogi pobl sydd â dipyn o gic ynddynt ac sydd â hanes o waith i ffynnu’n gyflymach; a bydd hefyd yn creu llwybr effeithiol i bobl sydd angen mwy o gefnogaeth.
Bydd y cyfranogwyr yn gweithio gyda’u Hanogwr Gwaith o’r Cynllun Ailddechrau gydol eu siwrnai yn ôl i waith er mwyn:
Meithrin sgiliau gwerthfawr ar gyfer gwaith, gan gynnwys hyfforddiant ar gyfer swyddi penodol.
Cael mynediad i beiriannau chwilio ar-lein lle ceir miloedd o swyddi gwag yn y DU.
Ailhyfforddi neu ddiweddaru sgiliau i gyd-fynd â’r galw am lafur a’r sectorau twf.
Rhoi sylw i rwystrau personol a chymdeithasol rhag cael gwaith.
Meithrin sgiliau cyflogaeth gwerthfawr, megis ymarfer ar gyfer cyfweliadau.
Cael eu paru â chyfleoedd gwaith addas.
Mae cymhwysedd yn ôl disgresiwn Anogwr Gwaith y Ganolfan Byd Gwaith, a rhaid i’r hawlwyr fodloni’r canlynol:
(a) wedi bod ar Gredyd Cynhwysol neu Lwfans Ceisio Gwaith am 9 mis neu fwy yn olynol,
(b) bod yn yr IWSR ar adeg atgyfeirio,
(c) ddim mewn cyflogaeth ar hyn o bryd (mae rhai hawlwyr hunangyflogedig yn gymwys i gael eu hatgyfeirio),
(d) bod â’r hawl i weithio yn y DU,
(e) preswylio yng Nghymru neu Loegr,
(f) bod yn oedran gweithio (16* i oedran pensiwn y wladwriaeth),
(g) ddim yn cymryd rhan mewn unrhyw Gontract Darpariaeth Cyflogaeth arall gan yr Adran Gwaith a Phensiynau
